 |
Gweinidog: Y Parch. Ddr R. Watcyn James Ysgrifennydd: Mr Alan Wynne Jones |
 |
Croeso i Wefan Capel y Garn Pwrpas y wefan yma yw rhannu gwybodaeth am Gapel y Garn, Bow Street, Aberystwyth, ac estyn gwahoddiad cynnes i chi i droi i mewn i gyd-addoli gyda ni ar y Sul neu ymuno yn y gwahanol weithgareddau a gynhelir gan yr eglwys. Ers ei sefydlu tua 1793, mae i'r eglwys hanes maith a chyfoethog o hyrwyddo'r dystiolaeth Gristnogol yn yr ardal, a'n gobaith yw y bydd y wefan yn un ffordd arall o gyflawni hyn i'r dyfodol. Amserau cwrddFel arfer, cynhelir gwasanaethau yn y capel bob Sul am 10 a 5 o'r gloch, ac mae ysgol Sul i'r plant yn ystod gwasanaeth y bore.Mae Capel y Garn yn un o saith eglwys sydd yng ngofalaeth y Garn, dan weinidogaeth y Parchedig Ddr R. Watcyn James, ac fe gynhelir oedfaon arbennig i holl eglwysi'r ofalaeth ar rai Suliau. Bydd yr oedfaon hyn yn cael eu cynnal am 10 o'r gloch, ac ni fydd gwasanaeth nos yn y Garn ar y Suliau hynny. Byddwn hefyd yn cydaddoli'n rheolaidd â chynulleidfa Capel Noddfa, eglwys yr Annibynwyryn y pentref.  GweithgarwchMae nifer o weithgareddau yn cael eu cynnal yn y capel yn rheolaidd, er enghraifft, cyfarfodydd Cymdeithas y Chwiorydd a'r Gymdeithas Lenyddol, a bydd y Garn yn cymryd rhan yn flynyddol yng Nghymanfa Ganu Unedig Gogledd Aberteifi.Gwaith gwirfoddolRhoddir llawer o bwyslais yn y Garn ar waith gwirfoddol a chodi arian i helpu pobl anghenus, er enghraifft, casglu bwyd i Bosnia dan ofal y Grŵp Help Llaw a chefnogi apêl flynyddol Cymorth CristnogolMae'r Garn hefyd wedi ymrwymo i fod yn eglwys masnach deg Trowch i mewn atomUn o eglwysi Eglwys Bresbyteraidd Cymru yw'r Garn, ond mae i unrhyw un droi i mewn atom ac ymuno yn ein haddoliad neu gymryd rhan yn ein gweithgareddau.Am ragor o fanylion, gweler y dyddiadur neu Gair o'r Garn, cylchlythyr yr eglwys, a gyhoeddir bedair gwaith y flwyddyn. Fe gyfeirir yn y crynodeb o hanes yr Eglwys at Ddiwygiad 1904/05 yn cyffwrdd â'r ardal hon ac am y miloedd a ddaeth ym Mehefin 1905, ychydig dros ganrif yn ôl, i addoli a moli Duw yn y capel hwn, ac yn y caeau o'i gwmpas. Ganrif yn ddiweddarach mae'r nifer yn dipyn llai, ond mae yma o hyd gyfeillgarwch a chynhesrwydd a brwdfrydedd. Rydym yn eglwys sydd yn edrych allan ac yn ymwybodol iawn o'r angen sydd yn ein byd, ac o'r herwydd mae yma gyfrannu hael a chyson. Ond rydym hefyd yn ymwybodol fod angen arall yn ein plith. Ganrif yn ôl, dod heb eu cymell a wnâi pobl i addoli Duw. Drwy'r wefan hon, gallwn nid yn unig ddweud peth o'n hanes, ond hefyd wahodd pobl i ddeialog, i ystyried, i bwyso'r hyn a ddywedir ac, efallai, i uno gyda ni yn ein haddoliad. Yr un yw'r neges heddiw ag erioed: O'r fath gyfaill ydyw'r Iesu, Ffrind ym mhob ystorom gref. |
Newyddion o'r GarnOedfa Haf yr Ofalaeth Bore Sul, 22 Gorffennaf 2018, daeth eglwysi'r ofalaeth ynghyd yng Nghapel Pen-llwyn, Capel Bangor, ar gyfer gwasanaeth arbennig dan arweiniad y Gweinidog. Cafwyd oedfa fendithiol gyda'n gilydd ar y thema: 'Myfi yw bara'r bywyd'. Gwnaed casgliad tuag at Hosbis yn y Cartref, Aberystwyth - elusen yr ofalaeth am eleni. Gair o'r Garn Mae'r rhifyn diweddaraf, sef rhifyn Haf 2018, bellach ar gael. I ddarllen copi electronig, cliciwch Gair o'r Garn Llongyfarchiadau i Meinir a Gwern ar eu canlyniadau gradd ardderchog, a phob dymuniad da i chi eich dau yn eich gyrfaoedd yn y dyfodol. Gŵyl yr Ysgolion Sul Cafwyd gŵyl lwyddiannus iawn ddydd Sul, 24 Mehefin 2018, yng Nghanolfan y Morlan, Aberystwyth. Arweiniwyd y sesiwn gan Dr Owain Edwards a Chriw Coleg y Bala, a braf oedd gweld plant o ysgolion Sul yr ardal yn mwynhau gemau, stori, ffilm a chân gyda'i gilydd. Roedd y bwyd barbeciw, dan ofal cyfeillion Capel y Morfa, hefyd yn flasus iawn, fel arfer! Gwnaed casgliad tuag at Dŷ Helyg, Ysbyty Bronglais, sy'n rhoi cefnogaeth werthfawri blant a phobl ifanc. Cymanfa Ganu Unedig Gogledd Ceredigion dydd Sul, 13 Mai, cynhaliwyd cymanfa lwyddiannus yng Nghapel y Morfa, Aberystwyth. Yng nghyfarfod y plant yn y bore, cyflwynwyd yr emynau gan blant ysgolion Sul y cylch, arweiniwyd y canu gan Llio Penri a chafwyd neges bwrpasol gan y Parch Eifion Roberts. Arweinydd cymanfa'r oedolion yng nghyfarfod yr hwyr oedd Alwyn Evans, a chafwyd oedfa fendithiol o ganu mawl dan ei arweiniad. Prosiect Cofio a Myfyrio Cafwyd noson arbennig iawn yng nghwmni Mererid Hopwood, nos Iau, 10 Mai 2018, yng Nghapel Horeb, Penrhyn-coch, yn glo i weithgareddau'r prosiect a fu'n ystyried effeithiau Rhyfel 1914-18 ar ardal gogledd Ceredigion. Wedi i gadeirydd y pwyllgor, Llinos Dafis, a gyflwyno crynodeb cynhwysfawr o hanes y prosiect, cafwyd sgwrs wefreiddiol gan y siaradwraig wadd ar 'Bensaerni"aeth Waldo'. Yn dilyn hynny, roedd cyfle i arwyddo Llyfr Gwyn Hedddwch a chymdeithasu dros baned. Gwnaed casgliad tuag at Gymdeithas Waldo a Chymdeithas y Cymod. I weld newyddion blaenorol, ewch i archif 2018 I'ch dyddiadur...
Ysgol Sul y Plant Bob bore Sul yn ystod tymor ysgol, am 10 o'r gloch, ar y cyd ag ysgol Sul Noddfa - croeso cynnes i blant a phobl ifanc o bob oed. Am fanylion pellach, ewch i'r dyddiadur "Gwreiddiau" Grŵp newydd sy'n cyfarfod yn festri'r Garn bob bore Iau rhwng 10.15 a 11.30 o'r gloch - paned, sgwrs a chyfle i archwlio ein gwreiddiau yn y ffydd, dan arweiniad ein gweinidog. Croeso cynnes i bawb. Oedfaon mis Awst Yn ôl ein harfer byddwn yn cydaddoli â chynulleidfa Capel Noddfa ar Suliau mis Awst. Am restr lawn o'r oedfaon, cliciwch oedfaon Awst Oedfa'r Ofalaeth Bore Sul, 2 Medi 2018, yng Nghapel Rehoboth, Taliesin, dan arweiniad y Gweinidog, am 10 o'r gloch. Croeso cynnes i bawb. Casgliad tuag at Hosbis yn y Cartref, Aberystwyth. Am restr lawn o ddigwyddiadau ewch i'r dyddiadur |
©Hawlfraint Ymddiriedolwyr Capel y Garn yw cynnwys gwreiddiol y safle. All original material on the site is copyright by the Trustees of Capel y Garn.
Crewyd y wefan/Website created by Technoleg Taliesin Cyf. - Admin/Gweinyddu